الحديث يزول ولكن يبقى أثره عالقا في العقل الباطن
بقلم نولا رأفت
وإحنا خارجين من حدوتة كبيرة اخذت من عمرنا وحياتنا وطاقتنا حتى المستقبل بقى مجهول وغامض بنبقى طالعين مرهقين مستنزفين مجروحين طاقتنا زيرو ما فيش إستعداد ولا حماس ما بنبقاش شايفين غير ضلمه وغموض محاوط كل شيء .
توتر العقل وإهتزاز القلب
مع اول ناس بتقابلهم في التوقيت ده بتبتدي، تفتح قلبك وتحس إن هما دول التعويض عن مرارة اللي عانيته وهيتصور لك إنهم ملائكة الرحمة، هيفضلوا يتكلموا بمنتهى المثاليه هتشوفهم البلسان اللي منتظر يضمد جرحك، ويلم اللي باقي منك بس في الحقيقه في الوقت ده انت بتكون مغيب ومعمي تماما إنك تعرف تفرق وتحس هم كده بجد ولا انا مش فاهم حاجه بتكون فعلا مش عارف تختار الناس اللي ممكن يكونوا هما التعويض ومكان لراحتك وسلامك وأمانك بس انت واقف متخبط ومش عارف تقيم ايه الصح وايه الغلط بتقنع طبيعتك انها تصدق حاجات مش موجوده وتنفي حقايق واضحه ومكشوفه وصوتها عالي بس
انت مصمم إنك تسد ودانك ومش عايز تصدق غير اللي أنت نفسك تعيشة وبس في الحقيقه الناس، دي كل شغلها الشاغل إنهم يسرقوا سلامك ويخزنوا داتا كبيره عنك هيستخدموها ضدك وقت جوعك واحتياجك ليهم .
الجمال الخارجي هو ليس كل شىء
في الوقت اللي بتكون في حالتك المزاجيه ونفسيتك واجوائك منتعشة وروحك طايره والامل ماليك في الوقت ده الانسان بيكون وكأنه بيطفوا على سطح الماء لكن وقت الندم هو وقت الدخول في العمق وده بالظبط، اللي بيحصل معانا بنشوف الناس حلوه ومتزينه من بره زي كل حاجه في أولها مريحة جميلة هادية شكلها حلو طباعها بتشدك، تبتدي تستحوذ عليك وعلى مشاعرك وتبدأ فعليا تحكي وتفضفض وتثق الي حد العماء بس لما بتقرب اكثر واكثر بتشوف العيوب هتحس انك، كنت بتضارب الهوا وهتحزن انك كشفت نفسك كشفت عيوبك فتحت باب قلبك بكل اللي جواه من ذكريات، وتفاصيل واحدث كنت بطلها بس مع الأسف بعد فوات الأوان في الحديث يزول، ولكن يبقى اثر في العقل الباطن هيفضل محفور جواهم كلامك وحكاياتك مش بسهوله الفكره هتتغير وتروح وهتفضل تتجلد وقت ما كنت عريان تماما ومكشوف قدامهم .
ودة لأن طبيعي جدا وانت في رحله حياتك هتتخبط كثير هتغلط كثير لانها رحلة مليانة، بالصراعات والتحديات واثبات النفس مليانه كمان طيش ونضج غلط وصح منطق وفكر عمق وتركيز شوية على فترات من اللاوعي واللامبالاة والا اااا في مليون حاجه وحاجه فهي مليانه ومليانه تفاصيل بس في الاول وفي الاخر هي حياتك انت انت وبس وانت بتحكي عن نفسك لازم تبقى فاهم ومتاكد ان الناس فترات في حياه بعض وان في وقت مش هيكونوا موجودين فيه وهيجي وقت ثاني مشاعرهم هتتغير هتكتشف انهم عاديين عاديين جدا لدرجه هتحسسك بمنتهى السذاجه وهتبدا تشوف الصوره كامله بشكل ثاني اعمق وأوضح في مقوله جميله بتقول.
لا تقترب الى حد ابصار العيوب ولا تبتعد الى حد نسيان المحاسن.
لان الكل قرب ضريبته على نفس مستوى الاخذ والعطاء لابد يكون موجود في القرب ده توازن وانت بتقرب هتشوف تفاصيل كثيره بتخدش وتكسر الكيان اللي رسمته جواك للناس دي مع المواقف الصوره هتوضح اكثر هتشوف الخذلان في ابشع صوره الوعود بتختفي وتروح مش مش هتشوف ولا تسمع وقتها غير المبررات والاعذار وكانك مع ناس غير اللي عاشرتهم وعرفتهم وهو ده الوقت اللي هتستطعم فيه معنى الاذى وسط ناس اختارتهم بكامل إرادتك لكنك اتاذيت فما تقربش اكثر من كده، ولا تبعد لدرجه انكم تنسوا الموده والرحمه اللي بينكم وتتحولوا لاعداء اللغز كله والحكايه كلها في اتقان فن المسافات بين الناس وبعضها وده طبعا عمره ما هيكون وليد اللحظه ولا هيجي في يوم وليله الحياه هتعلمهولك شويه بشويه ما تسيبش افكار الماضي تحبسك وتسجنك وتسيطر عليك وتحولك لنسخه باهته لان ده اكتر وقت بتبقى عرضه انك تكون فريسه للناس اللي بتعرف تصطاد ويقعوا في فخوخهم طبيعه الناس دي بتكون شطار اوي في اختيار ضحاياهم .
مش كل القلوب على مقاسك ولا شبهك انت في الوقت ده بتكون تحت تاثير مسكنات الكلام المعسول والوعود الكدابة وحرب دايرة طحن جواك بين عقلك و قلبك اللي بقي، ضعيف مستسلم وخاضع بلا اراده بالشكل ده بتفضل مكمل وعاطي الامان ومطمن بس هتصحى على خزلان كبير اكبر من صدمتك قبل ما تعرفهم بس هتكون فوقت متاخر فالتوقيت ده يكون اشبه باللي طير شويه ريش في الهوا وحاول يجمعهم مره ثانيه ده اللي بيحصل لك وانت بتحاول تفتكر مرارة خزلانهم ليك اوعى تياس وتحس ان الكون فاضي وتبدأ تتوحد وتقفل ع نفسك مش هو دة الحل ابدا
بعد فتره هتلاقي نفسك اخذت مناعة وقدرت تفهم أشكال وأنواع، مختلفه من الناس في ناس هترفض وجودهم وفي ناس هتلاقي مستوى الامان بيقل تدريجيا جواك ناحيتهم وهتحس بصدق الكلمة وهي طالعة هي حقيقي ولا فييك لانك طبيعي اتعلمت وخوضت معارك كتير هتكون قدرت تقيم من كل اللي مريت بيه وهتخرج كسبان أيوة كسبان هتعرف تحمي حدودك وتحارب وتدافع عن ملكيه اصغر تفصيله تخصك قلبك وعقلك مش هيفضلوا حقل تجارب هتفضل تقطع فيهم حتة بحتة خد وقفة صلبة وقول لنفسك كفاية كدة واعرف انك جيت الكوكب ده مره واحده بس ما لهوش اعاده فعيشوا بالطريقه اللي تقدر توفر لك راحت بالك لانها اغلى بكثير من اي تمن .
