دموع الخريف وحنين يختبئ داخل حقيبة من الذكريات
بقلم / نولا رأفت
بعد ما خرجوا أولادي لمدرستهم، وقفت أتأمل وأسرح وأخذني الحنين لحقيبة ذكرياتي. وفجأة، وأنا بتذكر، لقيت دموعي بتنزل. بصيت لنفسي وسرحت وقلت: هي إيه الدموع دي بس؟ يمكن زي ما في دموع الفرح، أنا هسميها دموع الخريف واااااه من الذكريات اللي مليانة فى الخريف .
ويمكن الأجواء دلوقتي وأحنا في أواخر فصل الصيف وهنستقبل الخريف ع الأبواب بتفكرنا بوقت الدراسة.
البراءة والعقل وسنوات الخبرة
وقد إيه الفصل ده مرتبط جوانا بتفاصيل وذكريات كثيرة ما بين الطفولة والصحاب ، ذكريات البراءة والعقل اللي لسه فاضي لسه بيتكون وبيحوش في معلومات وسنين وخبرات.
بس أكثر حاجة بتشغل العقل في الوقت ده هي شنطة المدرسة.
ما بين لونها وشكلها وأية هيكون جواها. زي مثلا أقلامها برايتها شكل المسطرة وعلبه الألوان هتكون خشب ولا فلوماستر ، والله على أسكيتش الرسم ده حوار لوحده. تفاصيل كتير وحكايات ما بين توكة الشعر وشكل التسريحة وياتري هأخد إيه سندوتشات بكرة.
كل ده وأنا واقفة سرحانة وبفكر في حقيبة الذكريات .
وخدني الحنين ما بين طفلة نفسها ترجع وتعيش نفس الأجواء بكل تفصيلة فيها.
وما بين إحساسي بالأمومة والمسؤولية ، خريف زمان محفور جوه قلبي من أصغر تفصيلة لأكبرها. من لون وشكل البرتقان الأخضر وهو نازل جديد وبيبتدي يميل للونة الطبيعي شوية بشوية.
زمان وأصحاب زمان
فاكرة تفاصيل أول يوم الساعة بتتغير فيها وشكل الغروب وهدوءه ، وتلاقي الولاد والتعب هدهم ويناموا بدري والليل مليان هدوء.
سرحت فى زمان وأصحاب زمان ، وجملة دموع الخريف دي فكرتني بناس دموعهم سبقاهم. بتلاقي دموعهم نازلة زي الشلال ومهما كان الموقف سهل وبسيط إلا إن الدموع هي اللي بتتكلم من كتر ما هي نازلة بغزارة.
طيب يا ترى الناس دي غاويين نكد ولا هي طبيعتهم كده ولا هو إيه بالظبط؟ بس في الحقيقة لو دورنا هتلاقيهم حاملين جواهم قلب شفاف نقي وبيور خالي من الشوائب والتعكير ، قلب خام معدن وحلو بيتأثر وبيحس بالناس يتعاطف معاهم ويحس بأوجاعهم.
للأسف بقينا بنشبههم بالبوم والغربان وبنفتكر في مصطلحات مليانة تنمر وأحنا بنقلدهم وهما متأثرين وعيونهم مليانة بالدموع. بقينا بنشوفهم ناس كئيبة وشها كشر بس ده مش بمزاجهم ولا هو زرار كنترول بحركة يتحكم في درجة انفعالتهم وإحساسهم ويقوله اسكت أو حس أو اتكلم.
هي خلطة وتركيبة ربنا خلقهم على فطرتها الناعمة الرقيقة الأشبه بالنسمه الهادية. الناس دي مش ضعفاء ولا هش ولا مسلوبين الإرادة. بالعكس هم أقوى وأثمن قلوب تتحب وتتعاشر في وسط عالم مليان بالزيف والتمثيل وبتحكم مظاهر خداعة علي موضة مطرقعة.
بقينا نشوف ع كل لون يا باتيستا يا بختك لو في حياتك ناس دموعها قريبة حضنها دافي تعرف تطبطب وتحس. حافظ عليهم واستمتع بيهم دول نعمة كبيرة وكنز عظيم ف وقت أصبح الشر والعنف بقى صوته عالي ورتم اليوم بقي سريع خلانا نفقد طعمه.
الحق اخطف كل لحظة مليانة دفا وحنية وسط الناس دي.
دول عطايا من ربنا ليك على الأرض اشكره عليهم وقدر قيمة كل حاجة طالعة من قلبهم ، الناس اللي دموعها قريبة ضحكتها كمان قريبة هتحس معاهم بروح كلها طفولة وبراءة ورا كل دموع حكاية قلوب بتهفهف مع كل نسمة طيف معدية قلوب بتحن لصندوق الذكريات.