رغم اني كسلان وف مشاكلي غرقان .. الظروف الحالية تجبرني علي العوده بكل عنفوان ” ربنا ما يكتبها علينا”
الرد_الخطير_الصحيح على_الصحفي_الأمريكي_القبيح
نصيحة مني عشان حد يتعرض للصحافة الغربية و خاصة الامريكية و البريطانية … مينفعش تطلع تقول هما قالوا علينا كذا و كذا و كذا … و انت مدلدل ودانك
من غير ما يكون عندك ادوات الرد عليهم
وتتناقلوا اتهامات يتلقفها الدهماء و يروجوا لها
الحكاية ان ال CIA جابت صحفي شهير اسمه مايكل روبين .. و قالتله بص احنا عايزينك تجيب مصر دي و تشهر بيها
صحفي امريكي بيكتب في جريدة middle east متخصص اساسا في الشأن الايراني و له كتب عنها
راح رازع مصر مقالة فيها كمية تشهير و ادعاءات و اكاذيب .. انما شغل وصاية
و انا بقا جيت عشان أرد علي هذه الادعاءات بالدلااااااائل و التواريخ
تنبيه هام:
ده مقال طويل .. عشان فيه معلومات كتير وحكي كتير .. ف اللي مش حابب النوعية دي من المقالات بلاش يقراه .. و الغير مهتم ميتعبش نفسه.
المهم زي ما ذكرنا تخصص الصحفي اللطيف هو الشأن الايراني
و له كتاب بيتكلم عن تاريخ الحرس الثوري اسمه الظلال ” كتاب اهبل كده كله حكايات بدون وقائع ” و كتاب ايران الخالدة و مقرتوش الحقيقة .
المهمة المكلف بيها سيادته معاليه جنابه……
المهمة المكلف بيها .. هي من نوعية المهام اللي بيكلف بيها الصحفيين من ال cia
و هي قلب الحقايق .. و توزيع التهم جذافا .. و البروباجندا الزائفة لترسيخ اكاذيب في العقل الجمعي علي انها حقيقة
الاعتداء علي اسرائيل في السابع من اكتوبر .. هو اعتداء مطابق لاعتداءات داعش علي الرقة و بغداد في سوريا و العراق
” انت بتنقش مني .. هو مين اللي قال ان اسرائيل وجه اخر لداعش “
هنا عشان نرد لازم نرجع للقانون الدولي عشان نعرف هي اسرائيل دولة و لا كيان ارهابي واخد شكل دولة احتلال
و مش هنلاقي احسن من اتفاقية چنيف المصدرة في 12 اغسطس 1949 … اي بعد اعتراف عصبة الامم باسرائيل بسنة و 3 شهور و اسرائيل موقعة عليها مادة 3 بند 1 الاشخاص الغير مشتركون في نزاع مسلح يعاملون معاملة انسانية دون تمييز
يوم 3 اكتوبر 2023 : منظمة هيومن رايتس و جمعية رعاية المعتقلين رصدت اعتقال 13 شخص من غزة دون تهمة موجهة لهم … و مرجعوش تاني
يوم 4 اكتوبر 2023 : تم الاعتداء باطلاق نار عشوائي علي عمال غزاوية اثناء قيامهم برفع انقاض سور مهدوم في مستوطنة شيدروت
و مات 2 و اصيب 7 من اصل 21 عامل اصابات خطيرة
يوم 6 اكتوبر 2023 : تم اقتحام مدرسة ابتدائي في دير البلح بدعوي ان فيها عنصر هارب من السجن
دي اسمها ايه اعمال اعتداء و ترويع و قتل علي الهوية
و دي السابقة بسسسس ل 7 اكتوبر
طب هو بند 1 فرع أ بينص علي اييييييه منع الاعتداء علي الحياة و السلامة البدنية وخاصة القتل بجميع اشكاله
ابقي سلم علي الاتفاقيات الدوليه……
يبقا مين هنا اللي بيخالف الاتفاقيات الدولية
خليك فاكر عشان هنحتاج معلومة الدول اللي بتخالف الاتفاقيات دي بعدييييين
اسرائيل كيان محتل يمارس الارهاب و العنف من 1918 و مذابح و مجازر في الاراضي الفلسطينية
يبقا القاعدة القانونية بتقول اييييه التصدي للارهاب لا يعتبر اعتداء
تحتم علي دولة الاحتلال ان تحمي الاشخاص المدنيين المنتمين للاراضي المحتلة وفقا للاتفاقية و هم السكان الاصليين
طب اسر*ئيل عملت ايه :
قتلت 40 الف امرأة و طفل
طب ليه اسرائيل مركزة علي قتل الستات و الاطفال بالشكل الغريب ده
عشان تقطع نسل الفلسطينيين
ده اسمه تطهير عرقي
و ده النهج اللي انتهجه البريطانيين لما دخلوا امريكا الشمالية … قتلوا الاطفال و الستات في ابادة وحشية للتخلص من نسل الهنود الحمر
تطبق هذه الاتفاقية بمجرد بدء اي نزاع او احتلال وردت الاشارة اليه في
” احتفظ بالمادة دي عشان هنحتاجها و احنا بنقيم الدول اللي بتخالف الاتفاقيات “
تطبق هذه الاتفاقية بمعاونة و اشراف الدول الحامية التي تكلف برعاية مصالح اطراف النزاع
و في بداية مقالك قولت
الدولة الحامية لاطراف النزاع هنا هي امريكا
اللي امدت اسرائيل ب 400 طن قذائف و اكثر من 50 الف قنبلة ووقود للطيار و مقاتلات و مليارات الدولارات للمساعدات العسكرية و اخرها 17 مليار دولار يوم 20 ابريل كلها مخصصة لابادة طرف النزاع الاخر اللي هما اصحاب الارض.
من اجل استمرار انتهاك المادتين 2 & 4
يبقا مين الارهابي 👈🏻 اسر*ئيل
و مين اللي بيخرق الاتفاقيات الدولية 👈🏻 الكيان الارهابي و الدولة الحامية للكيان الارهابي المكلفة بمراعاة اطراف النزاع اللي هي امريكا
لما ندخل للمعادلة مدخلات صحيحة …. لازم النتيجة تكون منطقية و صحيحة
مصر عايزة تمنع اسرائيل انها تحارب الارهاب في رفح
هي اسرائيل بتحارب الارهاب اساسا …. طب لما المعلومات اللي امدها ال cia للموساد ان حماس مقراتها في رفح
ليه بداية العملية العسكرية مكنش من رفح و كان النزوح عكسي من الجنوب للشمال
طيب مبدأوش ليه من رفح….
انا اجاوب نيابة عنك :
عشان ده فيلم هابط الهدف منه :
– ابادة عرقية لاهل غزة و التخلص منهم لتفريغ القطاع
– احكام السيطرة علي حقول غاز الشمال .. ثم حمايتها بانشاء قاعدة عسكرية و احاطتها بالمستوطنات
– دفع باقي الاهالي الفارين من الابادة الي سيناء
– من اجل سهولة ترويح اقامة دولة فلسطينية في سيناء .. و بعدها نقل اهل الضفة الغربية و تفريغ فلسطين بالكامل
” ده كله موثق بتصريحات و بيانات و اخبار من الميديا العبرية و الامريكية و تصريحات لمسئولين كمان “
ده المشروع الامريكي الاسرائيلي اللي اتعمل عشانه طوفان الاقصي .. و اللي مصر واقفة امامه
و في كل لقاءات ويليام بيرنز رئيس الاستخبارات الامريكية و انتوني بلينكن
ده بيكون المقترح
و بيقابل بالرفض
طب نرجع للماضي شوية مش كتير لأن علي رأي المثل اللي بيقول ان كنتم نسيتم اللي جري هاتوا الدفاتر تنقري ………..
في مارس 2011 : لقاء مرشد الاخوان محمد بديع و خيرت الشاطر و سعد الكتاتني
بالسفيرة الامريكية آن باترسون في السفارة الامريكية
وكان مفاد اللقاء اللي صرح عنه الاخوان في تسجيل لهم بعد كده 👈🏻 توصيل الاخوان للحكم و منحهم 6 مليار دولار تمويل للجماعة .. اللي زاد بعد كده ل 8 مليار دولار
في مقابل منح الفلسطينيين جزء من الشريط الحدودي في سينا لاقامة دولتهم
” هو انت يا مايكل متفرجتش علي الاختيار 3 و تسريباته و لا ايه … ده ولدنا بيتر ميمي كان عامل عظمة ”
في ابريل 2011 انشأ الاخوان حزبهم السياسي بتمويل امريكي جاء عن طريق تحويلات بنكية
” ما هي كانت البلد بزرميط بقااااا ”
في ابريل 2012 اخد الاخوان بالفعل مبلغ ال 8 مليار
و طلبوا مهلة سنة لتنفيذ الصفقة
لكن القدر كان مجهزلهم قفا عنابي … و فشلوا في تنفيذ الصفقة و اتخلعوا زي الضرس المسوس بالظبط
عمك باراك اوباما بقا تم استجوابه 5 مرات في الكونجرس في جلسات اتمنع الاعلام من تغطيتها
بتواريخ 👇🏻👇🏻
24 يوليو 2013
28 يوليو 2013
6 اغسطس 2013
14 سبتمبر 2013
22 ديسمبر 2013
و عندك سجل الكونجرس تقدر تراجعه ورايا
ال 8 مليار دول طلعوا من خزينة الولايات المتحدة تحت بند 👈🏻 دعم أمن اسر*ئيل
يبقا مين اللي بيحمي اسرائيل و بيبيد الفلسطينيين 👈🏻 امريكا
و مين اللي قبض عشان يحمي امن اسرائيل و يوسع عليهم بدل الزنقة اللي هما فيها 👈🏻 الاخوان المسلمين اللي هما كلاب امريكا
طب ليه انا بحكيلك الحكاية دي :
عشان تعرف ان مصر مدركة كويس ان امريكا عينها علي سينا من زمان .. من ايام كامب ديفيد
و بالتالي لازم نقف امام اجتياح رفح حرصا علي امننا
غزة كانت جزء من مصر من سنة 1949 الي 1967
و تركتها مصر مهملة و غير مطورة .. مما عرقل امكانيات فلسطين لاقامة دولة لحد دلوقت
ياتري مصر هي اللي أكلت الجبنة ………
نصحح هنا معلومات جغرافية و سياسية
مناطق الحكم الذاتي مناطق مستقلة لا تحسب ضمن حدود الدولة .. و ترسم الخرائط بدونها
يبقا الصح ايه 👈🏻 غزة كانت تحت ادارة مصر و ليست جزء منها
و ده يا عزيزي اللي هيخليك ترجع بذاكرتك للتاريخ شوية :
▪من سنة 1949 الي 23 يوليو 1952 : مصر تحت الاحتلال البريطاني
▪من سنة 1952 ل 18 يونيو 1956 ” تاريخ جلاء اخر جندي بريطاني ” : كان مازال هناك تواجد بريطاني في مصر لتنسيق رعاية مستعمراتها في افريقيا
▪سنة 1956 العدوان الثلاثي
و تدمير 3 مدن مصرية
ثم تكلفة اعادة اعمارهم
▪سنة 1960 في 9 يناير تحديدا : بدأنا بناء السد العالي و وجهت موارد الدولة لدعم المشروع
مع بناء مصنع السماد في اسوان
و مصنع الحديد و الصلب
▪سنة 1961 : بدأ البنك الدولي يطالب مصر بالديون اللي اخدتها منه بريطانيا لما كانت محتلة مصر .. وقالت انها صرفتها علي تطوير مصر
” حوووش التطوير كان مفرتك الترنك “
ثم اتجهنا للنهضة بالصناعة الوطنية
غزة ايه اللي هنصرف عليها فلوسنا و نطورها
ما عنها ما اتطورت .. احنا مالنا
و في سنة 1967 دخلت اسرائيل اخدت سينا و غزة بدعم قبائل القصاصين الفلسطينيين اللي خدعونا
كان المطلوب نجهز غزة و نلبسها و نحميها و نسرحلها ثم تأتي اسرائيل بزجاجة النبيذ و تمارس مجونها معها بارتياح علي رأي فولتير
طب نيجي للتاريخ الحديث :
▪في 15 نوفمبر 1988 اعترفت 80 دولة بدولة فلسطين في العاصمة الجزائر و منها مصر
ثم في 19 نوفمبر 1988
صرح الرئيس الامريكي بعدم اعتراف امريكا بفلسطين و لااااا بالمؤتمر ده اساسا
▪في فبراير 1989
ممثل منظمة التحرير الفلسطينية في جلسة الامن اعلن اعتراف 90 دولة بدولة فلسطين
و طالب بعقد جلسة لتوثيق الاعتراف ده
فاستخدمت امريكا حق الفيتو و افشلت الجلسة
▪في سبتمبر 1993
مؤتمر اوسلو
و طلب فيه وفد فلسطين بالاعتراف بدولتهم و اعلانها
راحت رفضت دول امريكا الشمالية و الاتحاد الاوروبي و استراليا هذا الطلب
و قالوا مفيش حاجة اسمها فلسطين و شيلناها من مقرراتنا الدراسية
▪في 29 نوفمبر 2012
اقرت الجمعية العمومية للامم المتحدة تغيير الوضع من ” الكيان الفلسطيني ” الي دولة مراقبة غير عضو
وافق 138 دولة
اعترض 9 دول منها امريكا و بريطانيا وفرنسا
و امتنع 41 عن التصويت
▪في 30 يوليو 2019
اعترفت 138 دولة بالدولة الفلسطينية
و رفضت امريكا
و قالت انها هتصدر عقوبات علي بعض الدول اللي هتفتح سفارات لفلسطين عندها
▪في 20 ابريل 2024
مجلس الامن و الامم المتحدة دعوا للاعتراف بدولة فلسطين
استخدمت امريكا الفيتو
و افشلت الجلسة
من يقف امام اقامة دولة فلسطينية هي الولايات المتحدة الامريكية .. و ذلك لرغبتها في تفريغ ارض فلسطين من الفلسطينيين و منحها بالكامل لاقامة دولة اسرائيلية .. مصر ملهاش دعوة
” شكة دبوس أهي .. مش كده ”
و لا هي الحلوة تلهيك
بيفكرنا مايكل روبين بتاريخ حماس الاسود معانا .. وقتلهم جنودنا و ظباطنا
و المفروض تدمير حماس ده لازم يكون حلم مصري مش اسرائيلي
لكن في اسباب تمنع مصر انهت تعمل ده .. و ان القاهرة تتمسك بمطالب حماس ووقف اطلاق النار
ومن هنا بدأ اخونا مايكل روبين الكوميديا و الحس الفكاهي
قالك لأن حماس مهمة اقتصاديا لمصر
اااه و الله زمبؤلك كده
” ما اصل كل جربوع معدي في الشارع يقولك احنا بنسند اقتصاد مصر ”
ازاي يا ميكي بس حماس بتفيد مصر اقتصاديا
قالك ان التجارة عبر الانفاق انعشت الاقتصاد و حققت مكاسب للطرفين
و ان تجارة الانفاق سبب في الدفعة الاقتصادية ايام المجحوم مرسي
هي اما تبقا عمارة كاملة بتطبخ علي انبوبة بوتاجاز واحدة .. و طوابييييير البنزين و نقص الخضار
دي دفعة اقتصادية
” علي رأي حسن حسني في المسرحية : كددددا ربنا مديني ”
و بيستطرد مايكل .. حلوة بيستطرد دي
ان السيسي اعلن اغراق كل الانفاق بمياه الصرف الصحي
لكن تقارير المراقبين الدوليين قالت انه احتفظ ببعض الانفاق و سلمها لادارة الجيش عشان يحتفظ بتجارتها
وهنا بقا من حقنا اننا نتحدي مايكل روبين .. ونطالبه بتقرير وااااحد من التقارير دي
او تاريخ لتقرير و انا هجيبه
لكنه مش هيقدر
لييييه 👈🏻 عشان مفيش مراقبين دوليين اساسا .. ومصر لم تسمح لمخلوق بالاطلاع علي خطة تطهير سيناء
و رفضت الطلب الامريكي انها تشرف علي خطة التطهير في 2018
و ده اللي بسببه متسلمناش المعونة العسكرية بتاعت 2017 المتأخرة و مخدناش اساسا منهم حاجة فيما بعد
طب عشان مايكل روبين ميفكرش اننا مغفلين … نستعرض مع بعض التجارة اللي عملتها مصر مع الانفاق
بس احنا تجارتنا لونها أحمر بلون الدم
▪ 7 اكتوبر 2004 : تفجير هيلتون طابا و منتجعين في نويبع
الضحايا 32 مصري
نفذها تنظيم كتائب شهداء عبد الله عزام التابع لتنظيم القاعدة اللي بيديره ظباط ال cia
▪23 يوليو 2005 :
تفجيرات مدينة دهب و نويبع
ضحاياها اكتر من 340 مصري
نفس التنظيم اللي نفذها
▪25 ابريل 2006 :
و اثناء احتفالنا بعيد تحرير طابا
اتنفذت 8 تفجيرات جوا طابا
استهدفت مصريين و سياح
وكانت مدبحة كبيرة
ندخل بقا علي شغل الوصاية العالي
▪فبراير 2011 : تفجير خط الغاز في العريش
▪3 يوليو 2011 : هجوم مسلح علي نقطة الشرطة في العريش و الضحية 6 شهداء
▪2 اغسطس 2011 : تنظيم القاعدة اللي بيديره ال cia ” احسن تكون مسمعتش ”
اعلن عن تدشين الخلافة الاسلامية في سيناء و اتخاذ رفح مقر لها
▪في 14 اغسطس 2011 :
اطلق الجيش المصري العملية نسر و طربق رفح علي دماغهم و هرب اكتر من 1000 ارهابي عبر الانفاق و اتقتل منهم 2000 كلب و يزيد
▪ 5 اغسطس 2012 :
مجزرة كمين العريش
اللي راح فيها 16 عسكري غلبان صايمين
نفذها ايمن نوفل الحمساوي ورفاقه
من اجل تمكين الاخوان من الاطاحة بالمشير طنطاوي
و اتسرق مدرعتين
و ظهر المدرعتين في قطاع غزة
▪9 اغسطس 2012 :
انطلقت العملية العسكرية سيناء
و اتقبص علي 38 منهم حمساوية طبعا
و اتقتل عدد كبير
و تم استرداد المدرعتين
” راحوا رجالتنا جابوهم من جوا غزة ”
▪3 مايو 2013 :
اتخطف ظباط شرطة
حوالي 11 ظابط
▪20 مايو 2013 :
انطلقت عملية عسكرية وتم تحرير المخطوفين
” ده غير ال 3 اللي خطفهم ايمن نوفل و قتلهم في غزة ”
▪من 3 يوليو الي 23 يوليو 2013 : بعد عزل المجحوم
39 هجمة كلها مصدرها الانفاق
ضحاياها مش بس عسكريين
و مدنيين كمان ” عمال مصنع اسمنت العريش
▪2 اغسطس 2013 : قنبلة فندق الجيش في العريش
▪ 25اغسطس 2013 :
استشهاد 25 فرد شرطة
اللي اتكتفوا و اترقدوا علي الارض و انضرب عليهم نار
فاكرينهم و لا نسيتوهم
و انطلقت عملية عاصفة سيناء
اتقبض علي 11 شخص منهم 5 من حماس و 3 امريكان منهم ظابط من ال cia
” اللي طالبتوا بالافراج عنه ده “
▪23 اغسطس 2013 :
اتقبض علي 32 اجنبي منهم 4 امريكان
▪11 سبتمبر 2013 :
تفجير مقر المخابرات في رفح
و نقطة التفتيش
و للصدفة البحتة يا عيني يطلع الانتحاري اللي فجر مبني المخابرات فلسطيني
” يمكن كان رايح تل ابيب و ال gps كان بايظ ”
▪16 فبراير 2014 :
تفجير اتوبيس طابا بتاع الكوريين
▪24 ديسمبر 2013 :
تفجير مديرية امن الدقهلية
مين اللي نفذه بقاااااا 👈🏻 تنظيم جيش الاسلام الذراع العسكري لانصار بيت المقدس
اللي هو مقره فييييين 👈🏻 في غزة
و مين القائد بتاعه 👈🏻 محمد درمش اللي هو فلسطيني من حماس من كتائب القسام
” مفاجأة مش كده “
قام ال cia معجبهش الشغل القطاعي ده
قالك ننزل بالجملة
▪في 11 اكتوبر 2014 : نزل ابو بكر البغدادي الملاعب
و غيرتوا اسم تنظيم بيت المقدس الي ولاية سيناء
واعلنوا البيعة للبغدادي
▪في 14 اكتوبر 2014 : نقلتوا تنظيم التوحيد و الجهاد من كابول الي رفح و الشيخ زويد
اللي هو مرتبط ارتباط وثيق بحركة الجهاد الاسلامي في غزة و لهم نفس القادة و نفس البيعة
مين بقا مؤسس التنظيم ده 👈🏻 خالد مساعد فلسطيني من مخيم جباليا
و بعد ما اتصفي تولي التنظيم ممتاز دغمش 👈🏻 فلسطيني كان رقيب في سجن الامن الوقائي في غزة عند محمد دحلان
و لما اتصفي تولي التنظيم حمادة ابو شيتة و فايز ابو شيتة 👈🏻 الاسطورة بتقول انهم سيناوية
لكن هما من الفرما فلسطين .. جدهم مححد ابو شيتة حاكم الفرما
و نزحوا لمصر بعد النكبة
تبدأ تظهر بقا بركات البغدادي
فتي ال cia المتميز
▪24 اكتوبر 2014 : مدبحة كرم القواديس
▪12 يناير 2015 : اختطاف ظبط شرطة
منهم ايمن الدسوقي اللي قتلوه علي الهوا
▪29 يناير 2015 : تنفيذ 6 هجمات في العريش ضحيتها 32 شهيد
▪31 اكتوبر 2015 : تفجير الطيارة المتروجت
و كمين البرث
و الكتيبة 101
و .. و .. و
دي ليستة توجع القلب و تحرق الدم من تاني
لحد انطلاق العملية الشاملة لتطهير سينا في 2018
و بدأت نارنا تبرد شوية وحسينا اننا بدأنا ناخد التار
هي دي تجارتنا عبر الانفاق
تجارة مع الله لن تبور
بيبيعوا ارواحهم للشهادة .. عشان يشترولنا أمان و مستقبل
ولادنا .. تحويشة عمر مصر و ضفايرها الحلوة
عليك العوض و منك العوض يارب
لكن ليه مايكل روببين بيدعي الادعاءات الساذجة بتاعت الانفاق دي
تمهيد للادعاء القادم
🔘الادعاء الخامس :
و ده بيصيغه في صورة سؤال :
هو ازااااي اسرائيل وجدت اسلحة كورية شمالية و صينية و روسية بالكم ده داخل غزة
دخلت منييييين .. مشممقن انا هتجنن يا كماااحة
اتحدااااك انك تجيب قصقوصة ورق اسرائيل زعمت فيها الاكاذيب دي
اسرائيل نفسها مكذبتش الكذبة دي
انني اتحداااااعك علي رأي كارمن
انت لميت كل الدول اللي مدياكم علي قفاكم .. وحطتهم في السؤال النابع من خيالات حالة السكر النابعة من ادمان شرب براندي معفن منتهي الصلاحية تفوح منه رائحة الايثانول
كل الميديا العبري بتتكلم عن اسلحة بدائية الصنع او ايرانية
بقا حماااااس هتشتري سلاح من مليارات ثرواتها .. ياخي اناااااه
كل مليارات قادة حماس علي كل قادة التنظيمات الارهابية السالف ذكرها بعملياتها اللي اتنفذت في مصر
لو كانت اتوجهت لاسرائيل
كان زماننا بنكتب كتب كتاب امك في الاقصي دلوقت علي عريس فلسطيني
بس للاسف بوصلتهم بطاريتها بتسرب شحن
و يجي يسأل سؤال تاني :
اسرائيل مسيطرة علي معظم حدود القطاع
و احبطت كتير عمليات دخول اسلحة تركية و ايرانية عبر البحر
السلاح ده دخل منيييييين