الكولاجين سر الجمال والصحة من منبت الشعر و حتى مفاصل القدمين
بقلم: رؤى مصطفى
في عز حر الصيف وجفافه، بشرتك وشعرك بيصرخوا “اسعفينا كولاجين!”، وده مش رفاهية… ومش كل الجفاف بسبب نقص المياه ده احتياج أساسي للجسم كله ولصحة مفاصلك.
عزيزتي، لو كنتِ لسه فاكرة إن الكولاجين مجرد سيروم غالي بيتحط على البشرة يبقى لازم نعيد حساباتنا سوا.
الحقيقة إن الكولاجين مش بس “تريند”، ولا مكوّن موضعي بتحطيه وتنامي، ده بروتين أساسي جوه جسمك، ومن غيره بتبتدي رحلة الجفاف والتجاعيد والتعب، من الجلد لحد المفاصل!
الكولاجين هو البروتين الأكثر وفرة في جسم الإنسان، مسؤول عن مرونة الجلد، قوة الشعر، صلابة الأظافر، وكمان ليونة المفاصل وصحة الأربطة. مع التقدم في العمر وزيادةالضغط العصبي، وسوء التغذية، والتعرض للشمس بدون حماية، إنتاج جسمنا الطبيعي للكولاجين بيقل. وهنا تبدأ المشاكل تظهر وخاصة للأشخاص إللى بيعانوا من أمراض مناعية إلتهابيه.
وطبعًا الصيف ما بيرحمش.
الحرارة العالية، التعرّق الزائد، شرب المياه القليل، البحر، الكلور، والتعرض المستمر للشمس،إضطراب الهرمونات،الأمراض المناعية كل ده بيستنزف رصيد الكولاجين في جسمك، وبتلاحظي:
بهتان في البشرة
جفاف وتقصف الشعر
تشقق في الأظافر
أوجاع في المفاصل حتى من غير مجهود
وهنا بييجي دور المكمل الغذائي، وخليني أقولك ليه:
الكولاجين الموضعي (اللي في الكريمات) مش بيخترق الجلد لدرجة إنه يغذي الطبقات العميقة أو المفاصل. إنما المكملات الغذائية اللي بتحتوي على كولاجين متحلل (Hydrolyzed Collagen أو Collagen Peptides) بتمتصها المعدة بسرعة، وتبدأ رحلة دعم الأنسجة من الداخل.
كيف نتناوله؟
الأفضل تاخديه مع ڤيتامين C لأنه بيساعد على امتصاص الكولاجين، وكمان مع حمض الهيالورونيك أو الزنك لو حابة تعززي النتائج الجمالية.
التوقيت الأمثل للجرعات؟
الأفضل على معدة فاضية صباحاً
ويفضل الانتظام عليه لمدة 8 أسابيع على الأقل عشان تلاحظي فرق واضح
وخليني أكون صريحة:
مش هيغنيكِ عن شرب المياه، ولا هينقذك لو انتي بتسهرى كتير وبتاكلي وجبات سريعة. لكنه هيكون دعم ممتاز لجسمك لو انتي قررتي تعتني بنفسك بجد.
— مصادر طبيعية تعزز الكولاجين في الجسم:
1. المرق العظمي (Bone Broth):
كنز فعلي للكولاجين. سواء كان لحم أو دجاج أو عظام الأسماك، مرقة العظم لما تتسلق لفترة طويلة بتطلّع كولاجين طبيعي سهل الامتصاص.
2. البيض (وخاصة البياض):
غني بالأحماض الأمينية الأساسية لتكوين الكولاجين، وكمان الكبريت اللي بيساعد في تركيبته.
3. الأسماك الدهنية (زي السلمون والسردين):
الجلد والعظام فيهم نسبة كولاجين عالية، وكمان أوميجا 3 اللي بيحافظ على مرونة البشرة.
4. الخضروات الورقية (زي السبانخ والكرنب):
مليانة بمضادات أكسدة وفيتامين C اللي بيساعد على تحفيز إنتاج الكولاجين.
5. الفواكه الحمضية (برتقال، ليمون، كيوي):
غنية بفيتامين C، المكوّن الأساسي لبناء الكولاجين.
6. الفلفل الأحمر والتوت:
بيحتووا على مضادات أكسدة قوية تحارب تلف الكولاجين الطبيعي في الجلد.
7. الثوم:
مصدر غني بالكبريت واللي بيساعد في تثبيت الكولاجين الموجود في الجسم.
8. بذور الشيا والكتان:
فيها أوميجا 3 ونحاس وزنك، وكلهم داعمين طبيعيين لصحة الجلد والشعر.
الخلاصة:
الكولاجين مش مجرد مكمل “موضة”، ده عنصر أساسي لصحة متكاملة من أول ملمس بشرتك، لقوة شعرك، لصحةمفاصلك.
والأجمل؟ إنك تخلطي بين كبسولة ڤيتامين مدروسة، وأكل طبيعي غني، ونمط حياة صحي.
وساعتها… الصيف مش هينال من جمالك ولا صحتك.
كاتبة المقال
الأستاذة / رؤي مصطفي