الحب ليس له موعد أومرحلة عمرية .. إستمتع بسنوات عمرك في كل وقت
الحب ليس له موعد ..إحرص علي الإستمتاع بسنوات عمرك في كل مراحل حياتك ، لاتدع اليأس يتملك منك الإطلاق ، كن على موعد أنه هناك فرصة ثانية فالحياة مليئة بالمفاجآت
بقلم : نولا رأفت
لا يلتقي الرائعون إلا فى أواخر العمر حبيت الجملة أوي، وفضلت أسرح كثير في معناها، هو معقول في فرصة ثانيه إنك تعيش تحب وتتحب تصدق ان لسه فيه أمل وحياة ممكن تتعاش على قد ما الدنيا صعبه على قد ما في لحظه ممكن تتغير ويتغير معاها كل شئ.
فلا يلتقى الرائعون إلآ بعد رحلة طويلة من التعب .
أجمل مافيها بعد تعب ومعاناة
وعلى قد ما القدر بيلعب معاك العاب نفسيه كثيره أوي برضو ممكن في لحظه تلاقي الدنيا كلها اتشقلبت رأسا على عقب، قابلت صديقة مكنتش شوفتها من وقت طويل وانقطعت أخبارها.
بس كل اللي اتذكره ان حياتها الأولى مع شريك حياتها كانت مليانه صراعات وضغوطات وكل اللي يشوفها كان شايف خيبة الأمل على وشها ولكن سبحان مغير الاحوال بعد فترة ليست بقليلة فوجئت وكل شئ قد تغير ازاي اتحولت لانسانه ناجحه واثقه في نفسها حتى تعبيرات وشها وملامحها اتغيرت أحبت الحياه لانها لقيت اللي امن بيها وصدقها خلاها تحب نفسها وتبرز اجمل ما فيها أعاد ليها روح التفائل وان لسة ف الايام أمل ورجاء عمرة ما هيخيب، بس مش بالضروره ان ده هنلاقيه في العلاقات العاطفيه فقط دة موجود حوالينا وبمختلف دواير حياتنا وعلاقتنا بين الناس الهدف والغرض من كلامي خلينا نصدق ان في قصه لسه ما أتعاشتش وأن في أمل لسه ما تحققش وأن في حياه جايه مهما اتأخرت.
الحياة ليست عادلة ولكن الله عادل وهذا يكفى
تعالوا نصدق أن بكره أحلى وأن الحياه مليانه مفاجآت بس ده لما نؤمن ان كل واحد عليه دوره ولازم يقوم بية أولهم حب حياتك وفتش ودور جواك أتصالح مع نفسك وعيوبك أكسر حواجز كنت بتخاف منها أمن وصدق ان ما فيش حاجه صدفه كل حاجه محسومه ومدروسه لها وقت وموعد
تحرر من مخاوفك
فالخوف هو كلمة من خمس حروف كفيلة تسجنك وتقضي عليك وزي ما قالوا إن الخوف هو مقبرة كل شئ بيدفنك ويحني ضهرك ويقيدك ، أتحرر منة واعرف ان الحياة مبتنصفش الجبان وعديم القدرة ، الحياة عايزة ناس محاربة جريئة قوية نفسها طويل
أنا شخصيا مؤمنة بمضمون كل الامثال الشعبيه وقد أية بتحمل الف معني ومعني لانها جاية من قلب ناس عصرتها التجارب وصنعتها الحكمة، وزي ما بيقولوا الحياة ليست عادلة
life is not fair
بس لو كملناها
هنلاقي ف معني اجمل واحلي معني مليان راحة نفسية أن الحياة ليست عادلة ولكن اللة عادل وهذا يكفى .
الرضي عظيم، بس مش هيعيشة الا الإنسان اللي وصل لمرحلة كافية من النضج لحد ما قدر يفهم ويستوعب أن الحياة مش هتمنحنا كل شئ وان امتلاك الاشياء مش هو الكفاية والشبع لكنة شعور داخلي انك مرتاح وراضي حتي وانت ف اشد الأوقات احتياج.
كل تأخير في حياتك لية حكمة ومعني وهدف فكل ما الاشياء تتأخر تضيف لها قيمه وتقل عكس ما الاشياء اللي بتحصل عليها بسهولة وسرعة بريقها بيختفي ويروح مش بيدوم كتير وزي ما بيقولوا اللي بيجي سهل بيروح كمان سهل ،، لكن كل حاجة اتدفع فيها تمن بتبقي غالية وليها هيبتها.
أرضي وصدق أن مفيش أنسان حياتة مفيهاش نواقص بس الشاطر والذكي اللي يعرف يخلق من العدم إنجاز .