الجهاز المناعي وأسباب انهياره وكيف تخلى عن حمايتك والدفاع عنك؟!! تابع الخبر على تريندات.
هل سبق وسالتى نفسك عن أسباب إنهيار جهازك المناعي ، والحقتى هذا السؤال بسؤال آخر هو : اليس من المفروض إنه يحميني فلماذا فجأة تحول عليّا وبدأ يهاجمني بدلا من أن يدافع عني .
بقلم : رؤى مصطفى
هل ترغبين في معرفة السر ؟
تعالى معنا لنتعرف عليه سويا في السطور القادمة وسأتحدث معك كما اعتدتى منى علي التحدث باللغه العامية البسيطة الدارجة التى أعتدنا علي الحديث بها فى لقائتنا العادية .
جيش للدفاع عنك
عارفة إن 90٪ من جهازك المناعي عايش جوه جهازك الهضمي؟!
أيوه، أمعاءك مش بس مسؤولة عن الهضم، دي كمان بتقود جيش الدفاع بتاعك!
بس لما الجيش ده يبقى نايم على ودنه، أو يضرب في صاحبه، يبقى لازم نراجع اللي بيحصل جوه.
أمعاءك… مركز القيادة المناعي
جسمك عبقري، بس لما تعيشي على قهوة مصنعة ومقليات وسكر ومعجنات وشوية فشار آخر الليل، وتحذفي الألياف والمياه من قاموسك، الأمعاء بتزعل حقيقى بتنهار.
ولما تزعل، بيحصل تسريب في جدارها (حالة اسمها Leaky Gut) وتدخل مكونات مش المفروض تدخل للدم…
وساعتها جهازك المناعي يتلخبط، يبدأ يهاجم الجسم كأنه عدو!
وطبلة الحرب تدق: أمراض مناعية زي الروماتويد، الصدفية، الذئبة، وأحيانًا حتى تكيس المبايض واضطرابات الغدة.
أعراض تقولك: أمعاءك مش مبسوطة!
انتفاخ مستمر
إمساك أو إسهال متكرر
تعب مزمن
حساسية من أكلات وأدوية كانت عادية
ضبابية في التفكير
تقلب مزاجي مفاجئ
تشوش فى الرؤية
ألم غير مبرر فى المفاصل
لو الحاجات دي مألوفة… يبقى عندنا شك في إن فيه خلل في توازن البكتيريا النافعة في الأمعاء.
طيب نعمل إيه؟ نتصالح مع أمعائنا بهذه الطرق.
1. الألياف: زودي خضار، فاكهة، بذر كتان…الحاجات دي بتحب بكتيريا الخير أو البكتيريا النافعه.
2. البروبيوتيك: زبادي طبيعي، لبن رايب، كرنب مخمر، مخلل الخيار بكمية بسيطة.
3. إمنعى السكر الأبيض والدقيق المكرر: البكتيريا الضارة بتعشقهم!
4. اشربي مية: السحر الأبيض اللي بيزبط كل حاجة.
5. نامي كويس: لأن الجهاز الهضمي بيشتغل على هدوء.
6. قولي لأ للقلق المزمن: التوتر عدو الأمعاء الأول كل مازاد القلق زاد هرمون الكورتيزول إللى بيدمر جهازك المناعى.
الرسالة الأخيرة:
عزيزتي…
مفتاح صحتك المناعية مش دايمًا في كبسولة غالية أو تحليل معقد، ممكن يكون في طبق سلطة، في شوية راحة نفسية، وفي اهتمام بجهازك الهضمي اللي بيشتغل في صمت.
فمن فضلك، اسمعي لأمعائك، صالحيها… وهي هتدافع عنك زي ما تستاهلي.
