مصطبة الفيس بوك .. حلقات يكتبها / مصطفى السبع ” رؤية مختلفة”
مصطبة الفيس بوك..ما هي علاقة الرجل المغامر مع الحذاء؟
الراجل ده عايش فى مجتمع زى اللى احنا عايشين فيه بالظبط .
مجتمع كله غموض والغموض عامل مشاكل نفسيه بين البشر.
هتلاقي حقد وغيره نميمه هتلاقي نفوس ضعيفه أوى.
فكر يعمل حكيم نفسي ويداوى البشر اللى عايش معاهم فى كل لحظاتهم سواء اهله جيرانه أصدقاءه زملاءه فى العمل. وجمعهم على مصطبة الفيس بوك عشان يتناقش معاهم فى موضوع بحثى ومهم فى حياتهم.
المهم بدأ يتابع ده ويتابع ده ويسمع من كل واحد مشاكله المهم اكتشف ان المواضيع كلها بسيطه ومش محتاجه كمية الاكتئاب وسوء التعامل والحقد والكراهية النميمية والغرور بين الناس وبعضها! وقف على نقطة وسأل نفسه هل كل اللى انا شايفه ده له علاقة بالنفسية الداخلية للإنسان.
مصطبة الفيس بوك
بالفعل فيه حاجه اسمها المرض النفسي الداخلي وده اللى بتمناه من ربنا سبحانه وتعالى انه يشفي كل من أصابه هذا المرض لانه مرض بيؤدى لأذى الغير
الانسان الذى يصاب بالمرض النفسي يقال عليه انه يحمل صفات النفسية المريضة المختلفة مع كل البشر.
لأن كل البشر لا يعجبهم صفات الانسان المريض نفسيا مع أن كل البشر هكذا لكن لا أحد يشعر بما يفعله وهل هو على صواب أم لا لكن محدش فعلا بيقف قدام المرايا ويشوف نفسه قبيح .
الراجل المغامر يتواصل حديثه على مصطبة الفيس بوك ويتحدث عن أنواع البشر وقال ! ان البشر نوعين نوع يكشف عن ما بداخله امام الجميع وده سهل التعامل معه لأنك خلاص عرفت أخره إيه والنوع الثاني وده صعب التعامل معاه لأنه نوع من النوع الصامت الرهيب اللى مبتفهمش هو عاوز ايه .
الراجل المغامر قال انا هركز مع الانسان الصامت عشان اعرف بيفكر ازاى.
بيقول ان المشكلة التى واجهتنى فى الانسان الصامت اللى مش بيتكلم ودايما صامت حاولت أقترب منه وبالفعل اقتربت منه جدا وعرفت بعض المعلومات الداخلية اللى جواه.
وللأسف ندمت ندما كبيرا بعد ما وصلت لتلك المعلومات اكتشفت ان سبب صمته انه مقتنع بأنه شخصية عبقرية تمتلك ذكاء خارق وان ماشي على نهج الصمت لغة العظماء وفضل أربعين عاما يعمل أبحاث عن عقلية الحمار وليه الناس دايما تتهم الحمار بالغباء ولغاية دلوقتى مش عارف يوصل لنتيجة حتى اليوم
الراجل المغامر بيقول اكتشفت ان أخطر إنسان تتعامل معه هو الانسان الصامت لأنك لو قربت منه عشان تعرف هو بيفكر فى ايه مش هتفهم منه حاجه وهتفضل تأنب نفسك طول حياتك انك قعدت معاه عشان تسمعه وفى الآخر مش هتوصل لنتيجة غير انك ممكن تخلع جزمتك وتضرب نفسك بيها عشان الوقت اللى ضيعته مع هذا الانسان ذو العقلية الازدواجية.
المجتمع مثله مثل البحر عندما يصاب بالاعصار يحدث عنه فيضان يأخذ اللى قدامه واللى وراه .
وبعد يوم طويل كله عناء وجلسات ولم أصل لحل المشكلة
وقلت نفسي اطلع نفسي من جوايا واضربها علقة.
عشان هى مش أمارة بالسوء فقط لا دى سبب فى حاجات كتير اوى وحشه فى حياتنا عشان كده عايز أضربها.لأن عتابها مش جايب نتيجة وانها دايما مشغوله بالآخرين.
خلاصة القاعدة والمغامر بيحكي قالهم فى النهاية
أى شخص فيكم هيكرر اللى عملته يضرب نفسه بالجزمة عشان ضيع وقته فى عتاب الناس اللى مش جايب نتيجة .
عشان كده لازم تغير من نفسك بلاش تشغل نفسك بغيرك بلاش تتدخل فى شؤن الغير لأن كل إنسان وله طريقه فى التعامل ومحدش هيتعب غيرك.
وقبل ما أنهي القاعدة دى شوية نصائح من اخوكم المغامر
وفر وقتك لمصلحتك
وفر وقتك لتطورك
وفر وقتك لنجاحك
وفر وقتك لخصوصياتك
وفر وقتك لأعمال الخير بس
وفر وقتك لكسب درجات عظمى عند الله
وفر وقتك لفتح فرص الرزق لغيرك.
وفر وقتك لصناعة الحب بينك وبين المحيطين بك.
وأخيرا أنهي المغامر جلسته على مصطبة الفيس بوك .
